Dato i privasidat
Bo ta skohe pa hasi skrinen prenatal? E ora ei bo dunadónan di kuido ta warda bo datonan den bo fail médiko. Esaki ta nesesario pa hasi e tèstnan i e tèstnan adishonal bon. Ta usa bo datonan pa kòntròl di kalidat, pa mónitòr i pa evaluashon. Si bo partisipá na e skrinen, bo ta duna pèrmit pa prosesá e datonan akí.
Kua dato ta warda?
E kòmbersashon ekstenso (counseling)
- Bo nòmber, fecha di nasementu, adrès i datonan di kontakto.
- Durashon di embaraso na momentu di e kòmbersashon.
- Fecha di kòmbersashon.
- Si bo ta skohe pa hasi skrinen prenatal i pa kua tèst bo ta skohe òf keda sin skohe.
NIPT
- Bo nòmber, fecha di nasementu, adrès i datonan di kontakto.
- Algun dato tokante bo embaraso (fecha ku a kalkulá ku bo ta duna lus, kantidat di yu den bo barika).
- Durashon di embaraso na momentu ku a kue sanger.
- Partikularidat médiko.
- Lugá i fecha ku a kue sanger.
- Resultado di NIPT.
Ekografia di 20 siman
- Bo nòmber, fecha di nasementu, adrès i datonan di kontakto.
- Algun dato tokante bo embaraso (fecha ku a kalkulá ku bo ta duna lus, kantidat di yu den bo barika).
- Durashon di embaraso na momentu ku a hasi e ekografia di 20 siman.
- Fecha di e ekografia di 20 siman.
- Resultado di e ekografia di 20 siman.
Ken por mira mi datonan?
E hendenan ku tin mester di e datonan akí pa duna bo bon kuido tin akseso na bo datonan. Esakinan por ta: bo partera, ginekólogo, spesialista di ultrazonido, trahadónan di e lugá kaminda ta kue sanger i/òf laboratorio i tambe e hendenan ku ta traha huntu ku bo dunadónan di kuido òf ku ta reemplasá nan. Nan por mira únikamente e datonan ku tin mester pa duna kuido.
Rijksinstituut voor Volksgezondheid en Milieu (RIVM) ta kolektá sifra general pa mónitòr i evaluá e programa di skrinen prenatal. Ta modifiká e datonan di tal manera ku mayoria di biaha no por konektá nan na bo persona mas.
Kuantu tempu ta warda dato?
E datonan ta den e fail médiko di e dunadó di kuido (partera, organisashon ku ta kue sanger, laboratorio) ku ta envolví den e tèstnan. E periodo pa warda dato ta 20 aña.
Ta warda sanger ku sobra despues di e tèst den laboratorio di NIPT pa 1 aña pa por hasi kòntròl di kalidat di e tèstnan.