Tèst adishonal despues di NIPT

Bo por laga hasi tèst adishonal si:

bo a haña un resultado di NIPT desviante. Tin un indikashon ku bo yu tin un apnormalidat di kromosoma.
tin motibu médiko pa hasi mas tèst. Por ehèmpel si bo tabata na estado un biaha kaba di un yu ku un apnormalidat di kromosoma. Bo partera por duna bo mas informashon tokante esaki.

Sorto di tèst adishonal

Amniosentesis (vruchtwaterpunctie)

Durante un amniosentesis dòkter ta prek ku un angua den barika i ta kue un tiki líkido amniótiko (vruchtwater). Bo por laga hasi un amniosentesis si bo tin 16 siman òf mas na estado. Ta hasi un amniosentesis na Dr. Horacio E. Oduber Hospital (HOH) na Aruba. Mayoria di biaha ta dura mas o ménos 1 pa 2 siman pa bo haña resultado. Tin biaha ta nesesario pa analisá e kromosomanan mas mihó. Esaki ta dura 3 pa 4 siman.

Tin un chèns di péridad di yu dor di un amniosentesis. Esaki ta sosodé serka 1 di kada 200 persona.

Ekografia ekstenso: GUO

Den e ekografia akí ta wak ampliamente si tin apnormalidat serka e yu. E tèst akí no ta hasi doló i no ta dañino pa bo yu. Un GUO ta para pa Geavanceerd Ultrageluid Onderzoek, Tèst Avansá ku Ultrazonido. Ta hasi e ekografia ekstenso akí den hòspital na Kòrsou.

Bo ke sa mas tokante tèst adishonal?

E ora ei bo por plania un kòmbersashon ekstenso ku un dunadó di kuido di hòspital. E por duna bo mas informashon tokante e resultado i kiko esaki ta nifiká pa bo yu. E dunadó di kuido ta papia ku bo di e posibilidatnan ku tin tambe. Despues bo por disidí kiko bo ta hasi. Bo por disidí ku bo no ta deseá di hasi mas tèst. Of ku bo ta deseá sí di hasi mas tèst. Bo no ta obligá na skohe pa esun òf pa e otro. Abo mes ta disidí.

Resultado di e tèst adishonal

Dòkter ta duna bo resultado di e tèst adishonal. Ta posibel ku e resultadonan ta indiká ku no tin ningun problema. Pero tambe ta posibel ku e tèst ta indiká ku bo ta na estado di un yu ku un apnormalidat di kromosoma. E notisia akí por kousa preokupashon òf tristesa. I ta probabel ku bo tin hopi pregunta. P’esei pronto ta plania un kòmbersashon ku un òf mas dòkter. Por ehèmpel ku un ginekólogo, un genetista klíniko òf un dòkter di mucha. E persona ku kende bo ta papia, por varia. Ta dependé di e apnormalidat ku haña.

Bo yu tin un apnormalidat?

Si bo yu tin un apnormalidat, bo ta haña un kòmbersashon ku un òf mas eksperto. Nan ta duna bo mas informashon tokante bo yu i kiko esaki ta nifiká. Kiko ta e kalidat di bida ku por spera ku e apnormalidat akí? Ki opshon di tratamentu tin? Ki edat bo yu por alkansá? Ki desishon bo por tuma?

Posibilidat despues di un resultado desviante

Ta dependé di e apnormalidat, ki posibilidat tin. Esaki ta loke bo por hasi ku e resultado:

Bo por sigui ku bo embaraso i duna lus.
Bo por kuminsá prepará pa yegada di un yu ku un apnormalidat di kromosoma. Tambe bo por regla kuido adishonal pa bo embaraso i parto.
Tin biaha e apnormalidat ta asina grave ku e yu por fayesé durante embaraso òf djis despues ku e nase.
E partera lo guia bo bon den e proseso akí.
Bo por skohe tambe pa laga terminá e embaraso.
E yu ta fayesé e ora ei. Papi’é ku bo partera, ginekólogo, dòkter di mucha òf genetista klíniko. I hasi tur pregunta ku bo tin. Bo ta skohe pa laga terminá e embaraso? Ta posibel pa hasi esaki te e di 24 siman di embaraso.

Abo mes ta disidí kiko bo ta hasi ku e resultado

Por ta hopi difísil pa disidí kiko bo tin ku hasi ora bo yu den barika tin un apnormalidat. Ta importante ku bo ta hasi un eskoho ku ta pas ku abo.

Bo tin mester di sosten?

Ekspertonan na hòspital por yuda bo. Bo por papia tambe di e tópiko akí ku bo partera, ginekólogo òf dòkter di kas. Tin biaha ta bon pa papia ku un dòkter di mucha, un genetista klíniko (dòkter spesialisá den genétika) òf un trahadó sosial. Hopi biaha bo por bai un organisashon spesialmente pa pashènt tambe. Puntra bo partera, ginekólogo òf dòkter di kas.

Papia ku hende ku ta importante pa bo

Por yuda pa papia ku otro hende ku ta importante pa bo, promé ku bo tuma un desishon. Manera bo pareha, bo mayornan, amigunan, un pastor òf domi, un iman òf rabi.