Tèst adishonal despues di e ekografia di 20 siman

Bo por hasi tèst adishonal si:

• bo tabatin un resultado desviante den e ekografia di 20 siman. Tin un indikashon ku bo yu tin un apnormalidat físiko.
• tin motibu médiko pa hasi mas tèst. Por ehèmpel si bo tabata na estado den pasado di un yu ku apnormalidat físiko. Bo partera por duna bo mas informashon.

Sorto di tèst adishonal

Ekografia amplio: GUO

Bo a disidí ku bo ke hasi tèst adishonal? E ora ei bo ta haña un tèst ekstenso di ultrazonido promé. Esaki yama: tèst avansá di ultrazonido. E tèst akí parse e ekografia di 20 siman pero hopi biaha e ta dura mas. E aparato ta mas detayá ku e aparato di ekografia di 20 siman. P’esei e spesialista di ultrazonido spesialisá den hòspital por mira mas detaye di e yu. Tin biaha otro eksperto ta opservá e ekografia tambe. E tèst no ta hasi doló ni e no ta dañino pa bo yu. Ta realisá e tèst ekstenso akí na Curaçao Medical Center (CMC).

Tin biaha e dòkter ta proponé pa kue sanger òf hasi un amniosentesis despues. Esaki ta dependé di ki apnormalidat nan a haña durante e tèstnan adishonal. E dòkter ta splika bo tur kos bon promé. Abo ta disidí si bo ke hasi un di e tèstnan akí.

Tèst di sanger

Bo ta kue sanger i laboratorio ta analisá bo sanger.

Amniosentesis (vruchtwaterpunctie)

Durante un amniosentesis dòkter ta prek ku un angua den barika i ta kue un tiki líkido amniótiko (vruchtwater). Pa no mishi ku e beibi, e dòkter ta kontrolá ku un ekografia unda e beibi ta drumí. Bo por laga hasi un amniosentesis for di e di 16 siman di embaraso. Ta hasi un amniosentesis na Dr. Horacio E. Oduber Hospital (HOH) na Aruba. Mayoria di biaha ta dura mas o ménos 1 pa 2 siman pa bo haña resultado. 

Tin un chèns di pérdida di yu dor di un amniosentesis. Esaki ta sosodé serka 1 di kada 200 persona.

Resultado di tèst adishonal

Dòkter ta duna bo resultado di e tèst adishonal. Ta posibel ku e resultado ta indiká ku no tin ningun problema. Pero tambe ta posibel ku e tèst ta indiká ku bo ta na estado di un yu ku un apnormalidat físiko. E notisia akí por kousa preokupashon òf tristesa. I ta probabel ku bo tin hopi pregunta. P’esei pronto ta plania un kòmbersashon ku un òf mas dòkter. Por ehèmpel ku un ginekólogo, un genetista klíniko òf un dòkter di mucha. E persona ku kende bo ta papia, por varia. Ta dependé di e apnormalidat ku haña.

Bo yu tin un apnormalidat?

Si bo yu tin un apnormalidat, bo ta haña un kòmbersashon ku un òf mas eksperto. Nan ta duna bo mas informashon tokante e apnormalidat di bo yu i kiko esaki ta nifiká. Kiko ta e kalidat di bida ku por spera ku e apnormalidat akí? Ki opshon di tratamentu tin? Ki edat bo yu por alkansá? Ki desishon bo por tuma?

Posibilidat despues di un resultado desviante

Ta dependé di e apnormalidat, ki posibilidat tin. Esaki ta loke bo por hasi ku e resultado:

• Bo por sigui ku bo embaraso i duna lus.
  Bo por kuminsá prepará pa yegada di un yu ku un apnormalidat. Tambe bo por regla kuido adishonal pa bo embaraso i parto.
• Tin biaha e apnormalidat ta asina grave ku e yu por fayesé durante embaraso òf djis despues ku e nase. E partera lo guia bo bon den e proseso akí.
• Bo por skohe tambe pa laga terminá e embaraso.
  Ora di un ekografia di 20 siman bo tin apénas algun siman di tempu pa e tèst adishonal. Esei ke men ku bo tin tiki tempu pa pensa kiko bo ta hasi ku e resultado. Papi’é ku e ekspertonan. I hasi tur pregunta ku bo tin. Bo ta skohe pa laga terminá e embaraso? Ta posibel pa hasi esaki te e di 24 siman di embaraso.

Abo mes ta disidí kiko bo ta hasi ku e resultado

Por ta hopi difísil pa disidí kiko bo tin ku hasi ora bo yu den barika tin un apnormalidat. Ta importante ku bo ta hasi un eskoho ku ta pas ku abo.

Bo tin mester di sosten?

Ekspertonan na hòspital por yuda bo. Bo por papia tambe di e tópiko akí ku bo partera, ginekólogo òf dòkter di kas. Tin biaha ta bon pa papia ku un dòkter di mucha, un genetista klíniko (dòkter di herensia) òf un trahadó sosial. Hopi biaha bo por bai un organisashon spesialmente pa pashènt tambe. Puntra bo partera, ginekólogo òf dòkter di kas.

Papia ku hende ku ta importante pa bo

Por yuda pa papia ku otro hende ku ta importante pa bo tambe, promé ku bo tuma un desishon. Manera bo pareha, bo mayornan, amigunan, un pastor òf domi, un iman òf rabi.